كوردى

له‌ به‌رلین مه‌به‌ست نابێته‌ پاساوی ئامراز

باسنيوز Basnews
مصدر الخبر / باسنيوز Basnews

بۆ كه‌سێكی رۆژهه‌ڵاتی، كه‌ له‌ ڕێی فڕۆكه‌ به‌ ئاسمانه‌وه‌یه‌ به‌ره‌و رۆژاوا، ئاسان نییه‌ بزانێت كه‌ ئاخۆ ره‌وشی رۆژهه‌ڵات چۆن ده‌بێت، به‌تایبه‌تی كاتێك به‌ فڕۆكه‌ له‌ فڕۆكه‌خانه‌ی تیكل له‌ به‌رلین ده‌نیشێته‌وه‌، ئنجا سه‌رنج له‌ دۆخی په‌رله‌مانی فیدراڵیی عێراق ده‌دات، كه‌ به‌ قسه‌ی كه‌سێكی هه‌رێمایه‌تیی كرد و به‌ ئاماژه‌یه‌كی ده‌ست سه‌رۆكی بۆ په‌رله‌مانه‌كه‌ دیاری كرد و بازی به‌سه‌ر هه‌موو ویست و خواستێكی دیكه‌دا دا. له‌و كاته‌ی تۆ له‌ شه‌قامێكی پاك و پوختی به‌رلین، له‌ گۆڕه‌پانێكی ئه‌و شاره‌دا ته‌ماشای دیواربه‌ندی قوربانییانی جووی ئه‌وروپا ده‌كه‌ی، گه‌مه‌ی شاراوه‌ی پشت په‌رده‌كانی رۆژهه‌ڵات خۆی به‌ زه‌یندا ده‌كات. ئه‌و گه‌مه‌یه‌ش قوربانیی لێ ده‌كه‌وێته‌وه‌، به‌ڵام مه‌رج نییه‌ قوربانییه‌كان هه‌ر مردوو بن، به‌ڵكوو ئه‌وان قوربانیی بڕیارێكن. ئاخۆ ده‌بێ ئه‌و بڕیاره‌ش چی بێت؟

هه‌ر له‌ پێش ڕا پێمان وایه‌ ئه‌و بڕیاره‌ له‌ ده‌ستپێشخه‌ری و هه‌نگاوێكه‌وه‌ سه‌رچاوه‌ی نه‌گرتووه‌، به‌ڵكوو ئه‌وه‌ بڕیاری بازنه‌یه‌كی فراوانتره‌. ئه‌و بڕیاره‌ی ده‌درێت و قوربانیی لێ ده‌كه‌وێته‌وه‌، نابێته‌ ئه‌و بڕیاره‌ی كه‌ شكۆیه‌كی لێ ده‌كه‌وێته‌وه‌ و مێژووش باسی ده‌كات. ئه‌مه‌ی ئه‌مڕۆ له‌ به‌رلیندا به‌دی ده‌كه‌ین، به‌وه‌ی دوو كار ده‌بینین: یه‌كه‌میان بلۆك ده‌بینی كه‌ له‌ گۆڕه‌پانێكدا دابه‌ش كراون و بۆ جوو ده‌گه‌ڕێنه‌وه‌، ئه‌مه‌ش به‌ پیاده‌كردنی بڕیاری كه‌سێك، كه‌ ویستی مێژوو به‌ چه‌شنێك یادی بكاته‌وه كه‌ كه‌س نایخوازێت، به‌وه‌ی قوربانیی لێ بكه‌وێته‌وه‌. كاره‌كه‌ی دیكه‌ش ئاواكارییه‌.

تۆ له‌و كاته‌ی به‌ته‌نیشت قوربانییانی جوودا تێپه‌ڕ ده‌بیت، به‌رامبه‌ری ده‌بینی ئه‌وا سلینگ وه‌ستاون، وا ته‌لار به‌ شێوه‌یه‌كی مۆدێرن ئاوه‌دان و نۆژه‌ن ده‌كه‌نه‌وه‌، كه‌ له‌ شه‌ڕدا خاپوور كرابوون.

له‌وێدا كه‌لاوه‌ی ته‌لار و كڵیسه‌ش هه‌ن، كه‌ پاشماوه‌ی جه‌نگن.

له‌ به‌رلینی ئه‌مڕۆدا، ئه‌گه‌رچی تۆ بیرت له‌ لای وڵات و بڕیاری خه‌ڵكی خۆته‌، كه‌ چۆن به‌ فیتی لایه‌نی دیكه‌ دژ به‌ گه‌له‌كه‌ت ده‌وه‌ستنه‌وه‌، به‌ڵێ له‌ به‌رلیندا نوێخوازی و نوێبوونه‌وه‌ ده‌بینیت، ده‌شبینی كه‌ چۆن گه‌لان هه‌ن سوودیان له‌و شه‌ڕانه‌ بینیوه كه‌ به‌ سه‌ریاندا هاتوون، سوودیان له‌ ئه‌زموونی خۆیان بینیوه‌ بۆ بنیاتنانی ئایینده‌یه‌كی ئارام بۆ نه‌وه‌كانیان، هاوكات تۆ سه‌رقاڵی كارێكی، ره‌نگه‌ جێی بایه‌خیش بێت، ئه‌ویش ئه‌وه‌یه‌ كه‌ ئێمه‌ ئه‌گه‌رچی شه‌ڕ ماڵوێرانیی بۆ هێناین و داری به‌سه‌ر به‌رده‌وه‌ نه‌هێشتین و رووباری خوێنی لێ كه‌وته‌وه‌، سوودمان له‌ وانه‌كانی نه‌دیوه‌، نه‌ك هه‌ر ئه‌وه‌نده‌، به‌ڵكوو ده‌ست به‌ بكه‌ری شه‌ڕه‌وه‌ ده‌گرین، بۆ ئه‌وه‌ی به‌هێز بین، ته‌نانه‌ت كار ده‌گاته‌ چوونمان بۆ پاڵ بڕیاری خاوه‌ن شه‌ڕه‌كه‌ش.

من راسته‌وخۆ له‌ هه‌ولێره‌وه‌ به‌ره‌و به‌رلین نه‌چووم، به‌ڵكوو فڕۆكه‌كه‌مان چووه‌ شانشینی ئوردن، ئه‌و وڵاته‌ی وێڕای ئاسته‌نگ، توانیویه‌تی ده‌روویه‌ك بۆ مانه‌وه‌ی خۆی بدۆزێته‌وه‌. راسته‌ جوگرافیایه‌كی ئاڵۆزی هه‌یه‌، ده‌وروبه‌ری هه‌میشه‌ بۆ ئه‌و هه‌ڕه‌شه‌ن. كه‌س له‌ ئێمه‌ مه‌زه‌نده‌ی ئه‌وه‌ ناكات كه‌ خاوه‌ن بڕیاری ئه‌م وڵاته‌ توانیویه‌تی ئه‌و جوگرافیا ئاڵۆزه‌ و شانشینه‌كه‌ بپارێزێت، ئه‌ویش به‌ بڕیاری ناوخۆی وڵاته‌كه‌ و به‌ نیه‌تی پاراستنی پێكهاته‌ی وڵاته‌كه‌ و گوزه‌رانكردن له‌گه‌ڵ ده‌وروبه‌ر به‌ ویستی خه‌ڵكه‌كه‌ی.

به‌پێچه‌وانه‌ی ئه‌وه‌ی ئێمه‌ له‌ وڵاتی كورددا تێیدا ده‌ژین.

به‌ لۆژیكی میكاڤیللی، كه‌ خاڵی ده‌سپێكی بۆ میر یان سیاسه‌تمه‌دار داناوه‌، سیاسه‌تمه‌دار له‌ ژیانیدا دوو ده‌رفه‌تی بۆ دێته‌ پێش:
هه‌ر چۆنێك بێت، ده‌سه‌ڵات بگرێته‌ دەست و به‌ قازانجی كه‌سی سیاسه‌تمه‌دار سوودی لێ ببینێت، یان ده‌سه‌ڵات دابمه‌زرێنێت و شكۆیه‌ك بنیات بنێت و ژیانێكی سه‌ربه‌رزانه‌ش بۆ خه‌ڵك به‌دی بهێنێت.

هه‌ردوو ده‌رفه‌ته‌كه‌ش كۆتاییان هه‌یه‌. هه‌ر كۆتاییه‌ش له‌وی دیكه‌یان جودایه‌. كۆتایی ئه‌و كه‌سه‌ی سوودی له‌ ده‌سه‌ڵات وه‌رگرت، وه‌ك كۆتایی ئه‌و كه‌سه‌ نییه‌، كه‌ لەڕێی پیاده‌كردنی ده‌سه‌ڵاته‌وه‌ شكۆی به‌دی هێنا. پێشمان وا نییه‌ كه‌سێك هه‌بێت پێی خۆش بێت مێژوو وه‌ك به‌دكار و به‌دڕه‌فتار باسی بكات، به‌ڵكوو یه‌كێك له‌ خواست و ئاواته‌كانی هه‌ر كه‌سێك ئه‌وه‌یه‌، مێژوو وه‌ك پیاوچاكێك ناوی بهێنێت.

سیاسه‌ت به‌دفه‌ڕه‌، ره‌نگه‌ پاڵ به‌ كه‌سێكه‌وه‌ بنێت كه‌ مێژوویه‌ك بۆ خۆی دروست بكات، خۆ ره‌نگه‌ كه‌سه‌كه‌ بخاته‌ نێو ته‌پكه‌ و داویشه‌وه‌.

سیاسه‌تمه‌داری پێگه‌یشتووی تێگه‌یشتوو ئه‌وه‌یه‌، به‌رژه‌وه‌ندیی گشتی ده‌خاته‌ سه‌رووی به‌رژه‌وه‌ندیی تایبه‌ته‌وه‌. زۆر به‌داخه‌وه‌ كه‌من ئه‌و سیاسه‌تمه‌دارانه‌ی ئێمه‌، كه‌ بیر له‌ به‌رژه‌وه‌ندیی گشتی ده‌كه‌نه‌وه‌.

په‌ندی وتاره‌كه‌ش ده‌ڵێ، لۆژیكی “ئامانج پاساوه‌ بۆ ئامراز” لۆژیكێك نییه‌ كه‌ به‌رژه‌وه‌ندیی گشتیی بوێت، به‌ڵكوو له‌ خزمه‌ت به‌رژه‌وه‌ندیی تایبه‌تدایه‌.

 

Tu dikarî ev nûçe ji çavkaniya xwendin , Basnews

عن مصدر الخبر

باسنيوز Basnews

باسنيوز Basnews

أضف تعليقـك