كوردى

نێچیرڤان بارزانی: مامۆستا جەمال نەبەز بە بەرهەمەكانی زیندوو دەمێنێتەوە

قناة رووداو Rudaw
مصدر الخبر / قناة رووداو Rudaw

رووداو-هەولێر

سەرۆكوەزیرانی هەرێمی كوردستان لە پەیامێكدا بۆ كۆچی دوایی پرۆفیسۆر د. جەمال نەبەز‌، پەیامێكی سەرەخۆشی ئاراستەی بنەماڵە و دۆستان و هاوبیرانی دەکات و تێیدا هاتووە “مامۆستا جەمال نەبەز بە بەرهەمەكانی زیندوو دەمێنێتەوە”.

نێچیرڤان بارزانی، سەرۆکوەزیرانی هەرێمی كوردستان لە پەیامەکەیدا ئامادەیی حکومەت بۆ هه‌ر ئاسانكارى و هاوكارییەك بۆ ڕێوڕەسمی ناشتنەکەی دەردەبڕێت و رایدەگەیێنێت: “مامۆستا جەمال نەبەز، زانستكارێكی گەورەی گەلەكەمان بوو، لە بزووتنەوەی هزری و رامیاریی كورد و لە ناساندن و پشتیوانیكردن لە شۆڕشی كوردستان و داوا رەواكانی میللەتەكەی لە تاراوگە و ناوەندە رۆشنبیرییەكانی ئەوروپادا، هه‌روه‌ها لە بڵاوكردنەوەی بیر و هۆشیاریی نەتەوەییدا رۆڵێكی بەرچاوی هەبووە”.

ئەمڕۆ پرۆفیسۆر د. جەمال نەبەز، نووسەر و بیرمەندی نێوداری كورد لە تەمەنی 85 ساڵیدا ، بەهۆی نەخۆشی لە نەخۆشخانەیەكی بەرلینی پایتەختی ئەڵمانیا كۆچی دواییكرد.

دەقی پەیامەكە :

بۆ بنەماڵەی خوالێخۆشبوو پرۆفیسۆر د. جەمال نەبەز

بەداخەوە ئەمڕۆ هەواڵی كۆچی دواییی بیرمەند و زانستكار و نووسەری ناوداری نەتەوەكەمان پرۆفیسۆر د. جەمال نەبەزمان پێگەیشت. بەو بۆنە خەمناكەوە سەرەخۆشی لە ئێوەی بەڕێز و هەموو خزمان و دۆستان و هاوبیرانی مامۆستا جەمال نەبەز دەكەین، لە خوای مەزن داوكارین دڵنەواییی هەموو لایەك بدات. حكوومەتی هەرێمی كوردستان بۆ هه‌ر ئاسانكارى و هاوكارییەك بۆ ڕێوڕەسمی ناشتنى، ئامادەیە.

مامۆستا جەمال نەبەز، زانستكارێكی گەورەی گەلەكەمان بوو، لە بزووتنەوەی هزری و ڕامیاریی كورد و لە ناساندن و پشتیوانیكردن لە شۆڕشی كوردستان و داوا ڕەواكانی میللەتەكەی لە تاراوگە و ناوەندە ڕۆشنبیرییەكانی ئەوروپادا، هه‌روه‌ها لە بڵاوكردنەوەی بیر و هۆشیاریی نەتەوەییدا ڕۆڵێكی بەرچاوی هەبووە.

كتێب و بەرهەمە زۆرەكانی لە بواری هزری و ڕۆشنبیری و زمانەوانیدا، وادەكەن یاد و ناوی پرۆفیسۆر د. جەمال نەبەز هەمیشە بە زیندوویی بمێنێتەوە. یادى به‌خێر.

نێچیرڤان بارزانی
سەرۆك وەزیرانی هەرێمی كوردستان
8/12/2018

Tu dikarî ev nûçe ji çavkaniya xwendin , Rudaw

عن مصدر الخبر

قناة رووداو Rudaw

قناة رووداو Rudaw

أضف تعليقـك