كوردى

بەوێنە.. لە هەولێر دیکۆدرامایەک لەبارەی جینۆسایدی ئێزدیان نماییش کرا

باسنيوز Basnews
مصدر الخبر / باسنيوز Basnews

هێرۆ ئیسماعیل: تراژیدیای جینۆسایدی ئیزدییان هێشتا کاری زۆرتری دەوێ

کاتژمێر 7:00ی ئێوارەی رۆژی دووشەممە 2018.12.10 لە هۆڵی سینەماکانی ئیمپایەر لە فامیڵی مۆڵی هەولێر، نماییشێکی تایبەتی دیکۆدرامایی بەناوی (2 ساڵ و 8 مانگ و 6 ڕۆژ) پیشان درا.

 

چیرۆکی ئەم دیکۆدرامایە کە بەرهەمی کەناڵی کوردستان تی ڤییە، لە بنەڕەتدا لە ڕۆمانی (لیلی ولیالي الالم)ی خالید تەعلۆ وەرگیراوە، کە لەسەر چەرمەسەرییەکانی خوشکەکەی (لیلی تەعلۆ) بە دەستی تیرۆریستانی داعش نووسیویەتی و میدیاکار هێرۆ ئیسماعیل عارف، کاری ئامادەکردن و دەرهێنانی بۆ کردووە.

 

لەیلا تەعلو خدر، خانمێکی کوردی ئێزیدییە کە لە مانگی ئابی ساڵی 2014دا وەک هەزاران ژن و کچ و پیاو و منداڵ و گەنجی ئێزدی، لە شنگال کەوتە دەست چەکدارانی تیرۆریستی داعش، داعشییەکانیش بە درێژایی دوو ساڵ و هەشت مانگ زیاتر، وەک کەنیزەک مامەڵەیان لەگەڵ ئەو خانەمەدا کرد و رووبەڕووی چەندین جۆر ئازار و ئەشکەنجەی جەستەيی و دەروونییان کردەوە، دوای ئازادبوونی لەیلا بە شێوەیەکی سەرسوڕهێنەر لەدەست چەکدارە هووڤەکانی داعش، خالید تەعلۆی برای لەیلا، کە نووسەر و ڕۆشنبیرێکی دیاری نێو کوردانی ئێزدییە، بەسەرهاتی ڕۆژانی ئەسارەتی لەیلای خوشکی لەبن دەستی داعشدا، کردە ڕۆمانێک بەناونیشانی ((ليلى وليالي الالم)، بڵاوبوونەوەی ئەم کتێبە لە کاتی خۆیدا، لەنێو خوێنەراندا دەنگدانەوەیەکی باشی لێ کەوتەوە، نزیکەی ساڵێکە خانمە میدیاکار هێرۆ ئیسماعیل بەسەرهاتی ڕۆژانی دەستبەرسەریی لەیلای تا رۆژی ئازادبوونی، کردووەتە دیکیۆدرامایەکی 52 خولەکی بۆ هەردوو کەناڵی (کوردستان تی ڤی) و (زاگرۆس تی ڤی)، بەناونیشانی (2 سا ڵ و 8 مانگ و 6 رۆژ) و دوێنێ نماییشێکی تایبەتی بە سەبتایتڵی ئینگلیزییەوە کرا.

 

دیمەنەکانی دیکۆدراماکە لە لۆکەیشنی هاوشێوەی ئەو شوێنانە گیراون، کە داعش تێیدا هێرشی کردە سەر ئێزدییەکان، ئەکتەرەکانیشی جگە لە کۆمبارس، هەموویان یەکەم جاریانە ئەو کارە بکەن.

 

دەرهێنەر بەر لە نمایشی دیکۆدراماکە، لە وتەیەکدا گوتی: “ماوەیەکی زۆرە سەرقاڵی ئامادەکردنی ئەم کارە هونەرییەم، کە یەکەمین کارمە وەک دەرهێنەر، دوای خویندنەوەی ڕۆمانەکە و نووسینی سیناریۆ و پەیوەندیکردنی بە لەیلا تەعبۆ، ئەو کچەی تیرۆریستانی داعش بەدیلیان برد و کڕین و فرۆشتنیان پێوە کرد، بە هاوکاریی ستافێکی کارامەی کوردستان تی ڤی توانیمان کارەکە تەواو بکەین”.

 

هێرۆ ئیسماعیل زیاتر روونی کردەوە: “ئەوەى زۆر سەرنجمى راكێشا، جگە لە هەموو ئەو نەهامەتييانەى كە لەيلا خانمى ئێزدیى رزگاربوو لە دەستى داعش رووبەڕووى بووەتەوە، گەورەيى ئەو برايەى بوو كە توانى پەرتووكێكى وەها لەسەر خوشكەكەى بنووسێت، نووسەرى ئەم پەرتووكە خالید تەعلۆ كە دەكاتە براى لەيلا، زۆر ئازايانە تەحەدای هەمووانی کرد و بەوپەڕى بوێرییەوە باس لە هەموو ئەو نەهامەتى و ئازار و ئەشكەنجە و تەنانەت دەستدرێژييانە دەكات كە رووبەڕووى خوشكەكەى بوونەتەوە”.

 

هەروەها گوتی: “من بۆ خۆم لە تەلەڤزیۆنە بیانییەکان چەندین دۆکیۆمێنتاریم بینیوە کە لەسەر کارەساتی ئیزدییەکان کردوویانە، لە کاتیکدا وەک کورد و کوردستانی ئەوە کاری لەپێشینەی ئێمەیە و دەبێ ئیمە خۆمانی لێ بکەینە خاوەن، ئەزانم کاری زۆر لە کەیسی جینۆسایدی ئیزدییان کراوە، بەڵام هێشتاش ئەم تراژیدیایە کاری دەوێ، بۆیە پیویستە ڕۆشنبیران و ڕۆژنامەنووسان و میدیاکارانی کورد و تەنانەت هونەرمەندەکانیشی، هەریەکەو بە شێوازی خۆی زیاتر کاری لەسەر بکەن و بیکەنە سکانداڵێکی جیهانی”.

 

دوای نماییشی دیکۆدراماکەش، پانێڵێک بۆ هەر یەکە لە (لەیلا تەعلۆ و بەهار عەلی لە ڕێکخراوی “ئێمە” بۆ گەشەپێدانی مرۆیی و هێرۆ ئیسماعیل دەرهێنەری دیکۆدراماکە) لەبارەی کەیسی بە کەنیزەک‌کردنی خانمانی ئێزدی و ڕۆڵی وڵاتانی جیهان و حکوومەتی هەرێم، دەرگای گفتوگۆ بۆ ئاوەڵا کرا و ئامادەبووان بە سەرنج و پیشنیارەکانیان هەم لەسەر دیکۆدراماکە و هەم لەسەر تراژیدیاکە، پانێڵەکەیان دەوڵەمەندتر کرد.

 

هەر لەمیانی ڕێوڕەسمەکەشدا ڕێز لە چەند کەسایەتی و دەزگا و رێکخراوێک گیرا، کە لەو کارە هونەری و میدیاییەدا بەشدار و هاوکاری سەرەکی بوون.

 

Tu dikarî ev nûçe ji çavkaniya xwendin , Basnews

عن مصدر الخبر

باسنيوز Basnews

باسنيوز Basnews

أضف تعليقـك